Metodoloxía das sondaxes
Como calculamos a media, que sondaxes excluímos e que significa a banda de incerteza.
Que sondaxes entran
Entran as sondaxes de intención de voto para o Congreso con estimación de voto. Exclúense as sondaxes de partido (a «empresa» é un partido, como PSOE ou Sumar), os recálculos de terceiros sobre datos do CIS (por exemplo «CIS (Opina 360)»: non son publicacións do CIS) e as filas que só dan escanos. O CIS oficial si entra. As sondaxes excluídas aparecen na táboa, marcadas.
Peso por antigüidade
Cada sondaxe perde peso de xeito exponencial desde o final do seu traballo de campo: aos 14 días vale a metade. Só se usan sondaxes dos últimos 60 días; se hai menos de 5, a xanela amplíase ata un máximo de 240 días.
Peso por tamaño de mostra
O peso medra coa raíz cadrada da mostra (referencia: 1.000 entrevistas), coa mostra limitada entre 200 e 3.000. Unha sondaxe sen mostra publicada entra, pero coma se tivese 500 entrevistas.
Límite por empresa
Despois dos dous pesos anteriores, o peso conxunto de cada empresa limítase ao 20 % do total, para que quen publica moito non domine a media.
De Sumar a Frente Amplio
As sondaxes que usan «Sumar» e as que usan «Frente Amplio» alimentan unha soa liña, «Sumar/FA». A comparación co 23X usa o resultado de Sumar.
Incerteza
A banda é a media ± 1,96 desviacións típicas. A desviación combina a dispersión entre sondaxes (dividida polo número efectivo de sondaxes) e un erro sistemático común de 0,3 puntos máis o 2 % da media. É unha indicación da orde de magnitude, non un intervalo calibrado.
Comparativa entre empresas
Para cada sondaxe compárase cada cifra coa media do resto de empresas nesa data (con sondaxes anteriores e posteriores, mesmos pesos). O sesgo dunha empresa é a media desas diferenzas nos últimos 12 meses.
Período de silencio
O artigo 69.7 da LOREG prohibe publicar, difundir ou reproducir sondaxes desde cinco días antes da votación. Àgora agocha todas as sondaxes e a media desde o 24/11 ás 00:00 ata o 29/11 ás 21:00 (hora peninsular). A web é estática: o corte aplícase ao compilala e, como rede de seguridade, tamén no navegador segundo a súa data.